у адаптацыі шэф-кухара Алены Мікульчык.
Рэцэпт нацыянальнай кухні.
Текст на русском языке ЗДЕСЬ.
Або маканка? Ці маканіна? А можа верашчака? Як правільна?
Адказ не настолькі відавочны, як падаецца. Калі браць такія назвы, як мачанка, маканка, маканіна, то яўна гаворка ідзе пра маканне, і ў залежнасці ад мясцовасці жыхары вымаўлялі так ці інакш. А верашчака – гэта мачанка?
Калі звярнуцца да паэмы Якуба Коласа “Новая зямля”, то так. Возьмем урывак з ІІІ раздзелу “За сталом”:
— Ну, небажаты, будзем снедаць.—
У людзей садзяцца ўжо абедаць.
Цягні мачанку, маці, з печы!
За стол, малы, за стол, старэчы!
…
Тымчасам маці даставала,
Чыгунчык з печы, лыжку брала,
І верашчаку налівала,
А за сталом на верашчаку
Падгатаўлялі ўжо атаку.
Напэўна, у тыя часы, калі Якуб Колас надрукаваў сваю паэму “Новая зямля”, а гэта быў 1923 год, у свядомасці жыхароў Беларусі ўжо замацавалася, што мачанка і верашчака – гэта адно і тое. Да гэтай пары нічога не змянілася.
У сваёй кнізе “Белорусская кухня: гастрономический путеводитель” гісторык кулінарыі Алесь Белы лічыць, што мае сэнс перагледзець такі падыход і развесці гэтыя паняцці паасобку, як і было першапачаткова, калі яны не былі тоеснымі, бо гэта ўзбагаціць беларускую культуру. Таму што мачанка – гэта чыста беларуская вынаходніцтва, якое налічвае не адну сотню гадоў сваёй гісторыі.
Відавочна, прыйдзе час і гісторыкі кулінарыі паставяць кропку ў гэтым лабірынце, што ёсць што і чым дакладна адрозніваюцца паміж сабой дзве вядомыя кожнаму беларусу стравы: мачанка і верашчака. А мы прапануем нашым чытачам не праходзіць міма рэцэпта мачанкі, які прапануе шэф-кухар, гісторык кулінарыі Алена Мікульчык у сваёй кнізе “Сакрэты беларускай кухні”. Мачанка можа быць рознай. Гэта і смажаныя скваркі, забеленыя смятанай, і яйкі, змешаныя з мукой і малаком ці вадой, і размяты тварог з малаком і смятанай. У некаторых раёнах Беларусі варылі селядца, дадавалі алей і муку з канаплянага семені, называлі гэта страву «лёк» і елі толькі з варанай бульбай. Хто бяднейшы, той у якасці «лёка» выкарыстоўваў расол ад селядца. Але, вядома, самая знакамітая мачанка са свініны, сала, часам з хатняй каўбасы, якую традыцыйна падавалі да бліноў. Гатуецца яна зусім не складана.
Прапануем вам далучыцца да гатавання мачанкі з кілбаскамі з індычкі. Усе астатнія інгрэдыенты адпавядаюць рэцэпту “Мачанка” у кнізе Алены Мікульчык “Сакрэты беларускай кухні”.
Чытаць/Скачаць рэцэпт на беларускай і рускай мовах можна ТУТ.
Інгрэдыенты:
— 900 г каўбасы з індычкі
— 6-7 цыбулін
— 6 ст. л мукі
— чорны молаты перац – на смак
— соль – на смак
— 2-2,5 л вады
Спосаб прыгатавання:
- Каўбаскі запякаем папярэдне ў духоўцы.
- Цыбулю чысцім ад лупіны і дробна наразаем, пасеруем на алеі.
- Адмерваем прыблізна паўлітра халоднай вады, астатнюю гатуем.
- Адмеранай халоднай вадой разводзім муку і ўліваем у кіпячую ваду. Варым да стварэння аднароднай масы. Мучная падліўка прыгатавана!
- Наразаем запечаныя каўбаскі, дадаём іх і падсмажаную цыбулю да мучной падліўкі. Солім, перчым. Добра перамешваем. Выкладваем у форму для запякання.
- Ставім на 20 хвілін у разагрэтую да 200 градусаў духоўку.
- Звычайна падаюць да стала з блінамі.
Смачна есці!
