Груша па-радзівілаўску з вінным мусам

у адаптацыі шэф-кухара Алены Мікульчык.
Рэцэпт нацыянальнай кухні.

Інгрэдыенты: — 4 сярэднія грушы — 350 мл белага віна (сухога ці паўсухога) — 100 г цукру (або на смак, у залежнасці ад гатунку грушы) — 4 жаўткі — 20 г жэлаціну — 1 цытрына — вяршкі ўзбітыя — мята для ўпрыгожвання

Чытаць/Скачаць на беларускай і рускай мовах можна ТУТ.

Спосаб прыгатавання:

• З цытрыны выціскаем сок, а лупіну наразаем на буйныя кавалкі.
• Грушы чысцім ад лупіны, выкладваем шчыльна ў адзін шэраг на дно рондаля і заліваем вадой так, каб яна пакрывала цалкам фрукты. Варым да паўгатоўнасці 10 хв.
• Затым дадаём цукар, скарынкі ад цытрыны і уліваем 100 мл віна. Варым яшчэ 10 хв пасля закіпання.
• Грушы дастаем, адвар працэджваем і вызначаем ягоны аб’ём.
• Жэлацін разводзім у невялікай колькасці вады, даем набрыняць 10 хв і пасля падаграваем да поўнага распушчэння. Колькасць жэлаціну бярэм з разліку 10 г на 400-450 мл сукупнага аб’ёму адвару і вады. Пераліваем у грушавы адвар, дадаём жаўткі і награваем да 80 градусаў на маленькім агні, увесь час памешваючы.
• Астуджваем, уліваем цытрынавы сок і віно, якое засталося.
• Грушы выкладваем у форму, заліваем гатовым сіропам і адпраўляем у халадзільнік для поўнага застывання.
• Падаем з узбітымі вяршкамі, упрыгожваем мятай.

Смачна есці!