Ягадная кулага

у адаптацыі шэф-кухара Алены Мікульчык.
Рэцэпт нацыянальнай кухні.

Інгрэдыенты: — 150 г трускавак (свежых ці змарожаных) — 150 г вішань бяз костак (свежых ці змарожаных) — 300 мл вады — 70 г жытняй мукі — сок 1 цытрыны — 120 г мёду (ці па жаданні) — для аздобы: узбітыя вяршкі, мята і  кавалачкі свежых ягад

Чытаць/Скачаць на беларускай і рускай мовах можна ТУТ.

Спосаб прыгатавання:

• Жытнюю муку падсмажваем на сухой патэльні да крэмавага колеру.
• Ягады здрабняем з дапамогай блэндэра. Палову атрыманай ягаднай масы змешваем з падсмажанай мукой, потым заліваем вадой і, увесь час памешваючы, даводзім да кіпення.
• Калі кулага астыне да 30-40⁰ С, дадаём да яе сок цытрыны,  мёд і астатнюю палову ягад.
• Падаем са ўзбітымі вяршкамі, мятай і кавалачкамі свежых ягад.

Гістарычная даведка:

Ягадная кулага

Ягадная кулага – старажытная страва, якая была шырока распаўсюджана яшчэ з далёкіх паганскіх часоў. Захавалася як страва менавіта на тэрыторыі сучаснай  Беларусі. Абавязкова гатавалася на Купалле.

Ягадная кулага — гэта своеасаблівы мус, які гатуецца з летніх ягад, жытняй мукі, мёду і вады. У старадаўнія часы выкарыстоўвалі, як правіла, адзін від ягад. Гатавалі па сезоне, бо лядоўні не было. Галоўнае – каб ягады былі без костак. Гэта чарніцы, трускаўкі, ажыны, маліны. Кансістэнцыя, у залежнасці ад рэгіёна Беларусі, мянялася ад кісельна-пітной (на поўдні) да густой кашы (на поўначы).

Страва “млела” ў печы, упарвалася, што дазваляла захоўваць багаты ягадны водар.

Рэцэпт, які прапануе Алена Мікульчык, парушае гістарычную дакладнасць: яна дадае свежы сок цытрыны, падсмажвае муку, варыць на пліце, а не ўпарвае ў печы толькі палову ягад, другую частку дадае свежай…

Яно і зразумела. Нашы продкі здагадваліся, але дакладна не ведалі пра вялікую карысць менавіта свежых ягад, не мелі тых тэхнічных магчымасцяў і часу для сваіх кулінарных вышукаў. Што казаць, на сталах простых людзей ў XVI стагоддзі не было звыклага для нас цукру!

Зразумела, што і густ на працягу часу мяняўся. За гэтыя пяцьсот год культура і навука вывелі нашае жыццё зусім на іншы якасны ўзровень, і канешне, кулінарыя не стаяла на месцы, а бурна развівалася. Каб сучаснікам было смачна есці стравы нашай нацыянальнай кухні, знаўца беларускай кухні Алена Мікульчык удасканаліла старажытны рэцэпт. Без сумневу, праз пяцьсот год беларусы XXV стагоддзя таксама будуць нешта мяняць у рэцэпце ягаднай кулагі, як гэта робім мы з вамі сёння. І гэта правільна! Жыццё і густы не могуць не мяняцца!

Гістарычная даведка падрыхтавана па матэрыялах знаўцы беларускай кухні Алены Мікульчык.