ў адаптацыі шэф-кухара Алены Мікульчык
Рэцэпт нацыянальнай кухні
Інгрэдыенты:
450-500 г пшанічнай мукі
100 г сметанковага масла
200 мл вяршкоў 20%
4 яйкі
15 г цукру
100 г фундуку
10 г дражджэй
½ ч.л солі
Чытаць/Скачаць на беларускай і рускай мовах можна ТУТ.
Спосаб прыгатавання:
- Жаўткі аддзяляем ад бялкоў.
- Дрожджы расціраем з цукрам, дадаём крыху цёплых вяршкоў, даём падысці.
- У муку ўліваем рэшту цёплых вяршкоў, дрожджы, якія падышлі, растоплены алей, жаўткі, узбітыя з соллю. Рашчыняем эластычнае цеста, даём пастаяць у цёплым месцы.
- Бялкі ўзбіваем асобна да моцнай устойлівай пены.
- Фундук падсмажым, пачысцім ад лупіны. Пасячом дробна нажом.
- Цеста раскатаем на таўшчыню 0,5 см, выражам прамавугольнікі прыкладна 6 на 8 см, змажам кожны з іх узбітымі бялкамі, пасыпем здробленым фундуком. Скруцім у невялікія рулецікі. Зверху змажам рэштай ўзбітых бялкоў, пасыпем арэхамі і буйной соллю.
- Выпякаем пры тэмпературы 1800 С 15-20 хвілін.
Гістарычная даведка:
Каралеўскі хлеб
Даследчыкі сцвярджаюць, што на тэрыторыі сучаснай Беларусі хлеб быў вядомы з II тысячагоддзя да н.э.
Да XVI ст. меню шляхты, мяшчанства і сялянства істотна не адрознівалася. З XVI стагоддзя сітуацыя пачынае мяняцца. Асобнае месца ў беларускай кухні займае каралеўская і радзівілаўская (менавіта да каралеўскай кухні радзівілаўская і адносіцца), таму што шмат якія стравы вельмі спецыфічныя як па інгрэдыентах, так і па тэхналогіі. Мучное печыва – не выключэнне.
Сярод мучных страў і прадуктаў асноўнае месца па традыцыі з даўніх часоў займае хлеб. Ён быў сімвалам багацця і дабрабыту, да яго ставіліся заўсёды з вялікай павагай.
Простыя людзі пяклі хлеб з жытняй мукі, а пшанічнай не выкарыстоўвалі. Апроч жытняй спажывалі аўсяную і грэцкую. Пшанічная мука была прывілеяй знаці. Заможная шляхта выпякала хлеб з мукі лепшых гатункаў. Асобна існаваў каралеўскі гатунак хлеба. Яго асаблівасць у тым, што цеста замешвалі на малацэ.
Прапанаваны шэф-кухарам Аленай Мікульчык рэцэпт “вырас” з кулінарнай кнігі польскіх аўтараў Дануты і Хенрыка Дэбскіх “Кухня Радзівілаў”, выдадзенай ў 1988 годзе. У сваю чаргу іх кніга паўстала са штодзённых меню князёў, якія запісваў адзін з прыдворных кухараў і якія знаходзяцца зараз у Літоўскім дзяржаўным гістарычным архіве. Менавіта ў “Кухні Радзівілаў” упершыню ўзгадваецца печыва з мукі імя Барбары Радзівіл, каралевы польскай і вялікай княгіні літоўскай. І невыпадкова.
Гэтая жанчына славілася сваёй адукаванасцю і прыгажосцю. Бацькі далі ёй бліскучую адукацыю, яна свабодна валодала і пісала на старабеларускай мове (афіцыйнай мове Вялікага Княства Літоўскага таго часу, на ім складаліся дзяржаўныя дакументы, вялося справаводства, дамовы, тэстамэнты і г.д.), таксама ведала літоўскую і лацінскую, грэцкую і нямецкую. Шматлікія гувернанткі і нянькі навучылі Барбару маляванню, паэзіі, ігры на музычных інструментах, фехтаванню, верхавой яздзе. Апроч таго яна вывучала матэматыку, геаграфію і тэалогію. Яе веды знаходзіліся на ўзроўні самых высокіх стандартаў еўрапейскага Рэнесансу. Прыкладна ў 18 гадоў яна стала жонкай сына аднаго з самых уплывовых магнатаў ВКЛ Альберта Гаштольда, ваяводы наваградскага Станіслава, а пасля таго, як аўдавела, у 1547 годзе ўзяла шлюб з каралём Жыгімонтам II Аўгустам. Шчаслівае сямейнае жыццё цягнулася нядоўга. У траўні 1551 года Барбара Радзівіл памерла ад рака малочнай залозы. Да такой высновы ў 1935 годзе прыйшоў польскі даследчык В. Зембіцкі.
Нягледзячы на асаблівасці і небагатую гісторыю радзівілаўскай кухні, шэф-кухар Алена Мікульчык прапануе прыгатаваць па матывах старажатнага рэцэпта вельмі смачнае і сытнае печыва, адрознае ад іншых. Знаўца гісторыі кулінарыі захавала прынцып гатавання, а далей – ваша фантазія. Гатуйце! Смакуйце! Атрымлівайце асалоду!
Гістарычная даведка падрыхтавана па матэрыялах знаўцаў беларускай кухні Алены Мікульчык і Алеся Белага.
