Тушаная скумбрыя ў гарбаце з цыбуляй

Можа быць карысна пры наяўнасці такіх пабочных эфектаў лячэння як страта апетыту; памяншэнне вагі; млоснасць і ваніты; нейтрапенія.

Інгрэдыенты: — 2 скумбрыі свежамарожаныя — 1 невялікая морква — 1 цыбуліна — не больш за 2 ч. л. солі буйнакрышталёвай — 3 ст. л. рафінаванага алею — 1 лаўровы ліст — 6 шт. перцу чорнага гарошкам Для заваркі гарбаты: — 1,5 ст. вады — 1-2 ст. л. сухой чорнай гарбаты

Чытаць/Скачаць на беларускай і рускай мовах можна ТУТ.

Спосаб прыгатавання:

1. Загаддзя моцна заварваем чорную гарбату. Заліваем сухую заварку гарачай вадой, вытрымліваем 10 хвілін, а затым працэжваем.
2. Вычышчаныя тушкі старанна прамываем і наразаем на кавалкі даўжынёй 4–5 см.
3. Моркву і цыбулю чысцім ад лупіны. Моркву наразаем тонкімі слайсамі. Таксама тонкімі паўколцамі наразаем цыбулю.
4. Бярэм посуд з тоўстым дном. Высцілаем часткай морквы дно каструлі. На моркву выкладваем рыбу зрэзам уніз. Рыбу пасыпаем цыбуляй і зверху раскладваем моркву, якая засталася. Заліваем алеем і гарачай гарбатай. Солім на смак.
5. Рыбу пры моцным нагрэве даводзім да кіпення, потым змяншаем агонь і варым пад вечкам 30 хвілін. Дадаём спецыі і варым яшчэ 5-7 хвілін.
6. Падаем скумбрыю з бульбяным пюрэ або адварным рысам.

Смачна есці!

Дзякуем Ірыне Жыхар за падрыхтоўку рэцэпта.