Салата з морквы, апельсіна і сухафруктаў

Рэцэпт на кожны дзень.

Інгрэдыенты: — 1 сярэдняя морква — 1 сярэдні апельсін — невялікі зубок часнаку ці на смак — 3-4 ядры грэцкага арэха — 3-4 шт чорнай сліўкі — разынкі — жменя — некалькі кропель свежавыціснутага соку цытрыны — алей, соль, молаты чорны перац – на смак

Чытаць/Скачаць на беларускай і рускай мовах можна ТУТ.

Спосаб прыгатавання:

• Чорную сліўку і разынкі заліваем на 10 хвілін гарачай вадой. Калі чорныя сліўкі буйныя, то пасля замочвання наразаем на чвэрці, калі дробныя, то – напалову.
• Апельсін дзелім на 2 часткі. Адну палову чысцім ад плеўкі і наразаем на невялікія кавалкі. З другой часткі выціскаем сок.
• Моркву чысцім ад лупіны, здрабняем на тарцы для карэйскай морквы, абдаем кіпенем, дадаём нарэзаны апельсін і чорныя сліўкі, разынкі, здробненыя ядры грэцкіх арэхаў.
• Рыхтуем запраўку. У асобнай місцы змешваем сок цытрыны, сок паловы апельсіна, алей, соль, молаты чорны перац. Запраўляем салату і старанна перамешваем. Адразу падаем да стала.

Дзякуем Ірыне Башанковай за падрыхтоўку рэцэпта.

Смачна есці!